Ընդհանուր տեղեկություններ

Գերմանիայի քաղաքացիներին կամ երրորդ երկրի քաղաքացիներին միավորվելու նպատակով (բացի ամուսինների, անչափահաս երեխաների և անչափահաս երեխաներին միայնակ խնամատարների միավորումից) կացության թույլտվություն կարող է տրամադրվել միայն ծայրահեղ բարդ կացության մեջ գտնվող ընտանիքի անդամներին (§36 AufenthG): 

Սա կարող է տեղի ունենալ այն դեպքերում, երբ ընտանիքի որևէ անդամին հրատապ կերպով անհրաժեշտ է  մյուս անդամի տևական օգնությունը, և վերջինս այս օգնությունը ի վիճակի է կազմակերպել միմիայն Գերմանիայում (օրինակ՝ առանձնահատուկ խնամքի անհրաժեշտության պարագայում): Ծայրահեղ բարդ իրավիճակը հիմնավորող հանգամանքները միշտ պետք է բխեն յուրաքանչյուր առանձին դեպքի անհատական առանձնահատկություններից (օրինակ՝ հիվանդություն, հաշմանդամություն, խնամքի կարիք, հոգեբանական օգնության կարիք: Բացի այդ՝ պետք է հիմնավորվի, թե ինչու հնարավոր չէ Գերմանիայից ստացված ֆինանսական աջակցությամբ Հայաստանում կազմակերպել պատշաճ խնամք, լինի դա պետական կառույցների միջոցով, խնամքի հաստատությունների, ինչպես օրինակ՝ ծերանոցների կամ խնամքի կենտրոնների միջոցով կամ տանը մասնավոր հիմունքներով կազմակերպված խնամքի միջոցով):

Ծայրահեղ ծանր դրություն չեն համարվում, օրինակ, անբարենպաստ դպրոցական, տնտեսական, սոցիալական կամ այլ իրողությունները հայրենի երկրում: Կանխավ ուշադրություն ենք հրավիրում նաև այն հանգամանքին, որ սովորական, տարիքի հետ կապված առողջական խնդիրները նույնպես (օր՝ Հայաստանում ապրող շատ մարդկանց տեսողության, լսողության, շարժունակության համեմատ դիմողի լսողության, տեսողության կամ շարժունակության վատացումը) հիմնականում չեն որակվում որպես ծայրահեղ ծանր դրություն: Նաև ընտանիքի այն անդամների նկատմամբ կարոտը, որոնք հիմնականում իրենց որոշմամբ են մեկնել արտերկիր, հիմնականում չի կարող որպես ծայրահեղ ծանր հանգամանք դիտարկվել: 

Անգամ ծայրահեղ ծանր դրության հիմնավորմամբ ընտանիքի վերամիավորման դիմում ներկայացնելիս անհրաժեշտ է դիմումատուի ներկայությունը, քանի որ անհրաժեշտ են նրա կենսաչափական տվյալները (մատնահետք): Մատնահետքի հանձնումը հնարավոր է բացառապես վիզայի բաժնում:

Վիզայի համար դիմում ներկայացնելը

Դիմում ներկայացնելու համար անհրաժեշտ է նախապես հերթագրվել։ Հերթագրվել կարող եք միայն առցանց եղանակով: Առցանց հերթագրման համակարգ կարող եք մուտք գործել դեսպանության կայքի միջոցով․ www.eriwan.diplo.de :

• Ոչ գերմանալեզու փաստաթղթերը՝ բացառությամբ անձնագրի տվյալների էջի, պետք է ներկայացնել գերմաներեն հաստատված թարգմանությամբ: 
• Վկայականները, դիպլոմները և նմանատիպ փաստաթղթերը պետք է ներկայացնել բնօրինակով և ապոստիլով/լեգալիզացիայով: Բնօրինակները կվերադարձվեն:
• Վիզայի համար հնարավոր է, որ անհրաժեշտ լինի ԳԴՀ համապատասխան վայրի Օտարերկրացիների հարցերով մարմնի (Ausländerbehörde) համաձայնությունը: Վիզան կարող է տրվել միայն, երբ դեսպանությունը ստանա այս համաձայնությունը: 
• Դիմումի քննությունը և մշակումը սովորաբար տևում է 6 – 14 շաբաթ, առանձին դեպքերում՝ ավելի երկար: 
• Ավիատոմսի ամրագրում վիզայի համար չի պահանջվում, խնդրում ենք ավիատոմս ամրագրել միայն վիզա ստանալուց հետո: 
• Դեսպանությունն իրեն իրավունք է վերապահում պահանջել լրացուցիչ փաստաթղթեր։ Լիարժեք դիմում ներկայացնելը դեռևս բավարար հիմք չէ վիզա ստանալու համար։ Ոչ լիարժեք փաստաթղթերը կարող են դանդաղեցնել գործընթացը և հանգեցնել դրանց վերադարձի կամ մերժման։ Դեսպանություն ուղարկված այն ֆաքսերը կամ գրությունները, որոնց վրա բացակայում է վիզայի գործի համարը,  չեն տեսակավորվում և չեն կցվում գործերին։
• Խնդրում ենք դիմումի վերոնշյալ մշակման ժամանակահատվածում ձեռնպահ մնալ դիմումի ընթացքի վերաբերյալ հարցումներ անելուց: Այդ հարցումները էապես ծանրաբեռնում են վիզայի բաժնի աշխատանքը, այդ պատճառով վիզայի բաժինը չի կարող պատասխանել:
• Վիզայի վճարը կազմում է 75 եվրո, որը վճարվում է դրամով՝ դիմումը հանձնելիս: 
• Բոլոր փաստաթղթերը (հատկապես անձնագրի պատճենները) պետք է ներկայացնել A4 ձևաչափով՝ առանց ամրացնելու, կարելու և թափանցիկ թղթապանակների։

Անհրաժեշտ փաստաթղթեր

Դեսպանությունը հուշում է, որ համաձայն Կացության մասին օրենքի §82–ի՝ յուրաքանչյուր դիմող պարտավոր է ապահովել դիմումի լիարժեքությունը, եթե որևէ փաստաթուղթ բացակայում է,  դեսպանությունը համարում է, որ այն չի կարող ներկայացվել։

Կարևոր ցուցումներ 

Ձեր ուշադրութունն ենք հրավիրում այն հանգամանքին, որ վիզայի դիմումը հանձնելիս որևէ այլ վճար, քան դեսպանության շենքում՝ վիզաների բաժնի պատուհանի մոտ գանձվող վիզայի վճարն է, նախատեսված չէ։

Դեսպանությունը չի համագործակցում տուրիստական ընկերությունների հետ։ Դա վերաբերում է նաև դեսպանության անմիջական հարևանությամբ գտնվող գրասենյակներին։ Ճամփորդական կամ այլ ծառայություններ մատուցող գրասենյակների աշխատակիցների պնդումներն այն մասին, որ իրենք համագործակցում են դեսպանության հետ, չի համապատասխանում իրականությանը։

Ոչ ոք չի կարող ազդել Ձեր դիմումի հաջողության հեռանկարի վրա, քանի որ դիմումների վերաբերյալ որոշումները կայացնում է բացառապես գերմանացիներից բաղկացած անձնակազմը։ Եթե Ձեզ այլ բան են խոստանում, ապա Ձեզ փորձում են խաբել։ Ոչ մի դեպքում գումար մի´ տվեք։ 

Վիզայի հետ կապված հարցերի մասին արժանահավատ տեղեկություններ կարող եք անվճար ստանալ դեսպանության վիզաների բաժնի աշխատակիցներից։ Այլ անձինք տեղեկություններ տրամադրելու իրավասություն չունեն։

Վիզայի համար հերթագրում

Ազգային վիզայի դիմումը պետք է հանձնել շատ ավելի վաղ, քան նախատեսված ճամփորդությունն է: Հերթագրումը կատարվում է առցանց և անվճար է: Կախված վիզայի տեսակից՝ դիմումի քննությունը կարող է շաբաթներ տևել:  
Պայմանավորվածության օրը գործերը կարող են հանձնել միայն նրանք, ովքեր գրանցման համակարգում ճիշտ են մուտքագրել իրենց անձնագրային տվյալները։
Հերթագրումը կարելի է իրականացնել հետևյալ հղումով․ Առցանց հերթագրման համակարգ
Խնդրում ենք մտածել պայմանավորվածություն ստանալու համար ժամանակին գրանցման մասին։

Յուրաքանչյուր դիմողի, նաև երեխաների համար, անհրաժեշտ է առանձին պայմանավորվածություն ամրագրել: Չի կարելի մեկ հերթագրման համար մի քանի անուն գրանցել։ Առանց հերթագրման կամ սխալ տվյալներով հերթագրված անձինք նույնպես չեն կարող դեսպանություն մտնել։
Բոլոր տվյալները պետք է լրացվեն բացառապես լատինատառ։

Ձեր տվյալները լրացրեք ճշգրիտ և անսխալ, քանի որ վիզայի բաժին մուտք գործել հնարավոր է միայն անձնագրային տվյալներին դրանց լիարժեք համապատասխանության դեպքում։

Ուշադրություն դարձրեք նաև Ձեր էլեկտրոնային հասցեի ճշգրտությանը, այլապես չեք կարող ստանալ Ձեր գրանցման հաստատումը և դեսպանություն այցելելու օրվա և ժամի մասին ծանուցումը։ 

_{Այս հուշաթերթիկի բոլոր տվյալները հիմնված են այն գրելու պահին դեսպանության ունեցած տեղեկությունների և վերլուծությունների վրա, ուստի դեսպանությունը չի կարող երաշխավորել հուշաթերթիկի լիարժեքությունն ու ճշգրտությունը հատկապես ընթացիկ փոփոխություների պատճառով:}