Բարի գալուստ ԳԴՀ արտգործնախարարության կայքէջերում
Կամավորականություն (BFD, FSJ, FÖJ, EFD)
Վիզայի համար դիմում ներկայացնելը
Դիմում ներկայացնելու համար անհրաժեշտ է նախապես հերթագրվել։ Հերթագրվել կարող եք միայն առցանց եղանակով: Առցանց հերթագրման համակարգ կարող եք մուտք գործել դեսպանության կայքի միջոցով․ www.eriwan.diplo.de :
- Ոչ գերմանալեզու փաստաթղթերը՝ բացառությամբ անձնագրի տվյալների էջի, պետք է ներկայացնել գերմաներեն հաստատված թարգմանությամբ:
- Վկայականները, դիպլոմները և նմանատիպ փաստաթղթերը պետք է ներկայացնել բնօրինակով և ապոստիլով/լեգալիզացիայով: Բնօրինակները կվերադարձվեն:
- Վիզայի համար հնարավոր է, որ անհրաժեշտ լինի ԳԴՀ աշխատանքի դաշնային գործակալության (Bundesagentur für Arbeit) և համապատասխան վայրի Օտարերկրացիների հարցերով մարմնի (Ausländerbehörde) համաձայնությունը: Վիզան կարող է տրվել միայն, երբ դեսպանությունը ստանա այս համաձայնությունները:
- Դիմումի քննությունը և մշակումը սովորաբար տևում է 2 – 6 շաբաթ, առանձին դեպքերում՝ ավելի երկար:
- Ավիատոմսի ամրագրում վիզայի համար չի պահանջվում, խնդրում ենք ավիատոմս ամրագրել միայն վիզա ստանալուց հետո:
- Դեսպանությունն իրեն իրավունք է վերապահում պահանջել լրացուցիչ փաստաթղթեր։ Լիարժեք դիմում ներկայացնելը դեռևս բավարար հիմք չէ վիզա ստանալու համար։ Ոչ լիարժեք փաստաթղթերը կարող են դանդաղեցնել գործընթացը և հանգեցնել դրանց վերադարձի կամ մերժման։ Դեսպանություն ուղարկված այն ֆաքսերը կամ գրությունները, որոնց վրա բացակայում է վիզայի գործի համարը, չեն տեսակավորվում և չեն կցվում գործերին։
- Խնդրում ենք դիմումի վերոնշյալ մշակման ժամանակահատվածում ձեռնպահ մնալ դիմումի ընթացքի վերաբերյալ հարցումներ անելուց: Այդ հարցումները էապես ծանրաբեռնում են վիզայի բաժնի աշխատանքը, այդ պատճառով վիզայի բաժինը չի կարող պատասխանել:
- Վիզայի վճարը կազմում է 75 եվրո, որը վճարվում է դրամով՝ դիմումը հանձնելիս:
- Բոլոր փաստաթղթերը (հատկապես անձնագրի պատճենները) պետք է ներկայացնել A4 ձևաչափով՝ առանց ամրացնելու, կարելու և թափանցիկ թղթապանակների։
Անհրաժեշտ փաստաթղթեր
Գերմաներենով կամ անգլերենով լիարժեք լրացված դիմում-հարցաթերթիկ՝ ներառյալ Կացության մասին դաշնային օրենքի §54-ով սահմանված իրազեկումը: Հարցաթերթիկը կարող եք գտնել դեսպանության կայքում՝ սույն հղումով. https://videx-national.diplo.de
Լիարժեք լրացված և ստորագրված հայտարարություն հասանելիության (հղում) վերաբերյալ։
2 նոր, բիոմետրիկ լուսանկար, մեկը խնդրում ենք սոսնձել դիմում-հարցաթերթիկին։
Գերմանիայի դեսպանությունը վիզայի ընթացակարգի համար ընդունում է միայն թարմ, բիոմետրիկ (կենսաչափական) լուսանկարներ։ Պահանջվող լուսանկարի վերաբերյալ ցուցումները կարող եք գտնել լուսանկարների նմուշների ցուցատախտակում, ինչպես նաև նմուշ-թերթիկում։
- գործող ճամփորդական անձնագիր, որը վավերական լինի առնվազն 6 ամիս, (անձնագրում պետք է լինի առնվազն երկու դատարկ էջ, իսկ անձնագիրը տրված լինի ոչ ավելի վաղ, քան տասը տարի առաջ),
- անձնագրի այն էջերի պատճենները, որտեղ առկա է կնիք, վիզա կամ որևէ այլ նշում։
- BFD: Ձեր պայմանագիրը պետք է ստորագրեք ոչ միայն Դուք, այլ նաև Ընտանեկան և քաղհասարակական հանձնարարությունների դաշնային մարմինը (BAFzA) և այն հաստատությունը, որն իրականացնում է կամավորական ծառայությունը (Träger):
- FSJ/FÖJ: Ձեր պայմանագիրը պետք է ստորագրեք Դուք և այն հաստատությունը, որն իրականացնում է տվյալ կամավորական ծառայությունը (Träger):
- EFD: Ձեր պայմանագիրը պետք է ստորագրեն Erasmus+ Jugend in Aktion -ի ազգային գործակալությունը և համակարգող կազմակերպությունը: Կամավորական ծառայության համաձայնագիրը, որում նկարագրվում են առաջադրանքները և նախատեսված ուսումնական արդյունքները, պետք է ստորագրեն համակարգող կազմակերպությունը և կամավորը: Ընդունող հաստատության հետ կնքված պայմանագիրը պետք է ներկայացնել բնօրինակով:
Միայն BFD/FSJ/FÖJ-ի դեպքում. ընդունող կառույցի, կամավորական ծառայության կազմակերպչի հավաստումը, որ նախնական փուլում Ձեզնից չի պահանջվում լեզվի իմացություն, կամ Դուք պետք է լեզվի դասընթաց անցնեք մեկնելուց հետո (հակառակ պարագայում՝ ուղղորդում դեսպանություն՝ դիմելու գերմաներենի հիմնային գիտելիքների վկայականի համար):
Ինքնուրույն շարադրած ինքնակենսագրություն՝ առանց բացերի, որում հատկապես կարևոր է ներկայացնել ստացած կրթությունը կամ աշխատանքային գործունեությունը (ներկայացնել երկու օրինակից)։
Հիմնավորագիր՝ երկու օրինակից, որում պետք է ներկայացնել նախատեսված կացության հետ կապված Ձեր սպասելիքները, ակնկալվող մասնագիտական և անձնական օգուտը, ինչպես նաև Ձեր հետագա ծրագրերը:
Որպես կանոն ընդունող կազմակերպությունը ստանձնում է գիշերակացի և սննդի ծախսերը: Եթե պայմանագիրը կամ ընդունող կազմակերպության այլ հավաստագիր չեն ներառում գիշերակացի և սննդի տվյալներ, ապա պետք է ներկայացնել լրացուցիչ ապացույցներ՝ կենսական ծախսերի ֆինանսավորումն ապահովելու մասին:
Այլ՝ ոչ Հայաստանի Հանրապետության քաղաքացիություն ունեցող անձինք, օրինակ՝ Ռուսաստանի, Իրանի կամ Հնդկաստանի քաղաքացիները իրենց բնակությունը Հայաստանում հավաստելու համար պետք է ներկայացնեն Հայաստանի կացության թույլտվություն՝ ռեզիդենտ քարտ (առնվազն վեց ամսվա):
Բժշկական ապահովագրություն՝ համաձայն ԵՄ նորմի (շենգենյան ողջ գոտու վավերականությամբ, նվազագույն ծածկույթը՝ 30.000,-- €, վավերական՝ մուտքի օրվանից մինչև կամավորական ծառայության մեկնարկը): Ապահովագրությունը պետք է ներկայացնել ամենաուշը վիզայի ստացման օրը:
Ընդհանուր տեղեկություններ
Կամավորական ծառայություններին (FSJ, BFD, FÖJ) մասնակցելու նպատակով Գերմանիա մեկնել ցանկացող անձինք կարող են վիզա ստանալ: Եվրոպական կամավորական ծառայություններին (EFD) մասնակցել ցանկացող անձինք պետք է բավարարեն որոշ նախապայմաններ: Կամավորական ծառայության տևողությունը կարող է տատանվել վեցից քսանչորս ամիս, որպես կանոն, սակայն, այն կազմում է մեկ տարի:
Այս ծրագրերի նպատակը հանրօգուտ աշխատանքն է, ինչպես նաև կարողությունների ձեռքբերումը: Դուք պետք է լինեք մինչև 27 տարեկան, եթե ցանկանում եք կամավորական սոցիալական կամ կամավորական բնապահպանական մեկամյա ծառայություն անցնել Գերմանիայում: Դաշնային կամավորական ծառայության համար տարիքային սահմանափակում չկա:
Դեսպանությունը հուշում է, որ համաձայն Կացության մասին օրենքի §82–ի՝ յուրաքանչյուր դիմող պարտավոր է ապահովել դիմումի լիարժեքությունը, եթե որևէ փաստաթուղթ բացակայում է, դեսպանությունը համարում է, որ այն չի կարող ներկայացվել։
Կարևոր ցուցումներ
Ձեր ուշադրութունն ենք հրավիրում այն հանգամանքին, որ վիզայի դիմումը հանձնելիս որևէ այլ վճար, քան դեսպանության շենքում՝ վիզաների բաժնի պատուհանի մոտ գանձվող վիզայի վճարն է, նախատեսված չէ։
Դեսպանությունը չի համագործակցում տուրիստական ընկերությունների հետ։ Դա վերաբերում է նաև դեսպանության անմիջական հարևանությամբ գտնվող գրասենյակներին։ Ճամփորդական կամ այլ ծառայություններ մատուցող գրասենյակների աշխատակիցների պնդումներն այն մասին, որ իրենք համագործակցում են դեսպանության հետ, չի համապատասխանում իրականությանը։
Ոչ ոք չի կարող ազդել Ձեր դիմումի հաջողության հեռանկարի վրա, քանի որ դիմումների վերաբերյալ որոշումները կայացնում է բացառապես գերմանացիներից բաղկացած անձնակազմը։ Եթե Ձեզ այլ բան են խոստանում, ապա Ձեզ փորձում են խաբել։ Ոչ մի դեպքում գումար մի´ տվեք։
Վիզայի հետ կապված հարցերի մասին արժանահավատ տեղեկություններ կարող եք անվճար ստանալ դեսպանության վիզաների բաժնի աշխատակիցներից։ Այլ անձինք տեղեկություններ տրամադրելու իրավասություն չունեն։
Վիզայի համար հերթագրում
Ազգային վիզայի դիմումը պետք է հանձնել շատ ավելի վաղ, քան նախատեսված ճամփորդությունն է: Հերթագրումը կատարվում է առցանց և անվճար է: Կախված վիզայի տեսակից՝ դիմումի քննությունը կարող է շաբաթներ տևել:
Պայմանավորվածության օրը գործերը կարող են հանձնել միայն նրանք, ովքեր գրանցման համակարգում ճիշտ են մուտքագրել իրենց անձնագրային տվյալները։
Հերթագրումը կարելի է իրականացնել հետևյալ հղումով․ Առցանց հերթագրման համակարգ
Խնդրում ենք մտածել պայմանավորվածություն ստանալու համար ժամանակին գրանցման մասին։
Յուրաքանչյուր դիմողի, նաև երեխաների համար, անհրաժեշտ է առանձին պայմանավորվածություն ամրագրել: Չի կարելի մեկ հերթագրման համար մի քանի անուն գրանցել։ Առանց հերթագրման կամ սխալ տվյալներով հերթագրված անձինք նույնպես չեն կարող դեսպանություն մտնել։
Բոլոր տվյալները պետք է լրացվեն բացառապես լատինատառ։
Ձեր տվյալները լրացրեք ճշգրիտ և անսխալ, քանի որ վիզայի բաժին մուտք գործել հնարավոր է միայն անձնագրային տվյալներին դրանց լիարժեք համապատասխանության դեպքում։
Ուշադրություն դարձրեք նաև Ձեր էլեկտրոնային հասցեի ճշգրտությանը, այլապես չեք կարող ստանալ Ձեր գրանցման հաստատումը և դեսպանություն այցելելու օրվա և ժամի մասին ծանուցումը։
Այս հուշաթերթիկի բոլոր տվյալները հիմնված են այն գրելու պահին դեսպանության ունեցած տեղեկությունների և վերլուծությունների վրա, ուստի դեսպանությունը չի կարող երաշխավորել հուշաթերթիկի լիարժեքությունն ու ճշգրտությունը հատկապես ընթացիկ փոփոխություների պատճառով: