Բարի գալուստ ԳԴՀ արտգործնախարարության կայքէջերում
«Deutschland Plus» - Արտերկրում դպրոցականների գերմաներենի ուսումը խթանելու մրցանակային ծրագիր
Աշակերտների խումբը դասարանում © educationpartner
Ծրագրին մասնակցել ցանկացող աշակերտները մրցութային փաստաթղթերը դեսպանություն պետք է ուղարկեն ամենաուշը մինչև 2026թ. մարտի 15-ը։
Գերմանիայի Դաշնային Հանրապետության արտաքին գործերի նախարարությունն աշխարհում գերմաներենի դասավանդումը խթանելու և օտարերկրյա դպրոցների՝ գերմաներենի բարձր առաջադիմություն ունեցող աշակերտներին պարգևատրելու նպատակով հիմնել է «Deutschland Plus» մրցանակային ծրագիրը, որն իրականացնում է Գերմանիայի դաշնային երկրամասերի կրթության և մշակույթի նախարարների խորհրդի Մանկավարժական փոխանակման ծառայությունը (ՄՓԾ/PAD):
Այն աշակերտները, որոնք կբավարարեն ստորև ներկայացվող պահանջները, կարող են դիմել Գերմանիայում անցկացվելիք երեքշաբաթյա ուսումնական ծրագրին.
- Գերմանիա մեկնելու օրվա դրությամբ աշակերտը պետք է լինի առնվազն 15, առավելագույնը՝ 17 տարեկան,
- ունենա ՀՀ քաղաքացիություն կամ առնվազն երեք տարվա մշտական կացություն Հայաստանում,
- ունենա գերմաներենի իմացության B1 մակարդակ,
- ցուցաբերի միջմշակութային և սոցիալական շփման ունակություններ,
- լիարժեք պատվաստված լինի կարմրուկի դեմ։
Այն աշակերտները, որոնք երկար տարիներ ապրել են Գերմանիայում և ունեն Գերմանիայի կամ գերմանախոս այլ երկրի քաղաքացիություն կամ արդեն իսկ մասնակցել են Միջազգային մրցանակային Deutschland Plus ծրագրին և սովորում են ավարտական դասարանում, չեն կարող մասնակցել ծրագրին։
Այցը տեղի կունենա նախնական տվյալներով 19.08.2026թ. - 07.09.2026թ.:
Ճամփորդական ծախսերը սկզբունքորեն պետք է հոգան մասնակիցներն անձամբ, սակայն յուրաքանչյուր մասնակցի կտրամադրվի 700 եվրո օժանդակություն։
Հավակնորդներն իրենց հայտերը ստորև նշված փաստաթղթերով՝ որպես PDF նիշք, դեսպանություն պետք է ներկայացնեն ամենաուշը մինչև 2026թ. մարտի 15-ը՝ էլեկտրոնային եղանակով,
- էլեկտրոնային տարբերակով լրացված անհատական հարցաթերթիկ,
- անձնագրի պատճեն (գործող անձնագիր),
- ծնողների կողմից լրացված և ստորագրված համաձայնություն,
- „Interessen und Motivation“ լրացված հարցաթերթիկը,
- դպրոցի գերմաներենի ուսուցչի կողմից տրված բնութագիր, որը պարունակում է տվյալներ աշակերտի լեզվական իմացության, վարքի և դպրոցական կյանքին ներգրավվածության վերաբերյալ, (դպրոցի պաշտոնական գրագրության ձևաթղթով, ինչպես նաև ուսուցչի անուն-ազգանվան նշումով և ստորագրությամբ),
- առողջության մասին հարցաթերթիկը, որը պետք է լրացնեն և ստորագրեն ծնողները։
- նոր լուսանկար։
Փաստաթղթերը պետք է ներկայացնել դեսպանության ku-100@eriw.diplo.de հասցեին (ամեն նամակը՝ առավելագույնը 8MB): Խնդրում ենք ուշադիր կարդալ հայտերի ներկայացման պայմանները, որոնք շարադրված են ծրագրի տեղեկատվաթերթիկում՝ անգլերեն և գերմաներեն տարբերակներով, և հայտերը ներկայացնել ըստ նշված պայմաննների։ Ոչ լիարժեք կամ ուշ ներկայացված հայտերը չեն կարող քննվել:
Ծրագրի մասին տեղեկատվաթերթիկը և լրացման ենթակա ձևաթղթերը կարելի է ներբեռնել ստորև նշված հղումներով․
Ծրագրի մասին տեղեկատվաթերթիկ՝ գերմաներեն
Ծրագրի մասին տեղեկատվական թերթիկ՝ անգլերեն
Ծնողների համաձայնության թերթիկ՝ գերմաներեն-անգլերեն