Բարի գալուստ ԳԴՀ արտգործնախարարության կայքէջերում
ԳԴՀ Մանկավարժական փոխանակման ծառայության կողմից առաջարկվող վերապատրաստման ծրագրեր գերմաներենի ուսուցիչների համար 2024թ.
Գերմանիայի կրթության և մշակույթի նախարարների խորհրդին կից Գերմանական մանկավարժական փոխանակման ծառայությունը արտերկրում գերմաներեն դասավանդող ուսուցիչներին առաջարկում է երեքշաբաթյա հոսպիտացիոն ծրագիր 2024թ․ նոյեմբերի 3-ից մինչև 23-ը (ժամանման և մեկնման ամսաթվերը), որի միջոցով մասնակիցները հնարավորություն կստանան ոչ միայն բարելավելու իրենց լեզվական և երկրագիտական գիտելիքները, այլ նաև կծանոթանան դպրոցի կազմակերպման և դասավանդման այնպիսի նորարարական ձևերի, ինչպիսին, օրինակ, ներառականությունն է։ Բացի այդ՝ նրանք ընդհանուր պատկերացում կկազմեն գերմանական կրթական համակարգի վերաբերյալ։
Ծրագիրն ուղղված է հիմնականում DSD-դպրոցների ուսուցիչներին,
- որոնք շաբաթական առնվազն 12 ժամ դասավանդում են «Գերմաներենը որպես օտար լեզու» առարկան կամ գերմաներենով՝ որևէ այլ առարկա տարրական, միջին և ավագ դասարաններում (6-18 տարեկան աշակերտներին),
- որոնք ծրագրին մասնակցում են իրենց մասնագիտական ճանապարհի հնարավորին վաղ փուլում, սակայն ուսմանը հաջորդած առնվազն երեք տարվա դասավանդման փորձառությունից հետո,
- որոնք ունեն գերմաներենի լավ կամ շատ լավ գիտելիքներ (C1 մակարդակ՝ ըստ լեզուների գնահատման համաեվրոպական սանդղակի), որպեսզի կարողանան հյուրընկալող դպրոցում ակտիվորեն մասնակցել դասերի ընթացքում ծավալվող քննարկումներին կամ ծրագրի մյուս միջոցառումներին,
- որոնք վերջին երկու տարիներին Գերմանիայում չեն մասնակցել որևէ վերապատրաստման,
- որոնք իրենց հայրենիքում արդեն իսկ ավարտել են գերմանալեզու վերապատրաստական դասընթաց,
- որոնք հետաքրքրված են, շահագրգռված են և հաղորդակցվող։
Մանկավարժական փոխանակման ծառայությունը Գերմանիայի Դաշնային Հանրապետության արտաքին գործերի նախարարության ֆինանսական միջոցներով կստանձնի հյուրընկալող դպրոցներում իրականացվող հոսպիտացիոն ծրագրի կեցության, ինչպես նաև հիվանդությունների, դժբախտ դեպքերի և հարուցած վնասներից բխող պատասխանատվության ապահովագրության ծախսերը, ինչպես նաև կտրամադրի ճամփորդական նպաստ, որն արտգործնախարարության համաձայնությամբ, որպես կանոն, սահմանվում է ըստ ավիատոմսերի արժեքի։
Մասնակիցները պետք է ներկայացնեն կարմրուկի դեմ պատվաստման բավարար պաշտպանության մասին տեղեկանք։ Այդ տեղեկանքը պետք է ներկայացնեն բոլոր նրանք, ովքեր ծնվել են 31․12․1970թ․ հետո։
Ծրագրին դիմելու գործընթացը հնարավորինս արդյունավետ կազմակերպելու համար գրանցումը կիրականացվի բացառապես առցանց: Այն ուսուցիչները, որոնք հավակնում են մասնակցելու հոսպիտացիայի գերմանական դպրոցներից որևէ մեկում, կարող են լրացնել առցանց դիմումաձևը https://forms-dev.kmk-pad.org/paschhos/person/start հղումով և էլեկտրոնային տարբերակով ուղարկել այն Մանկավարժական փոխանակման ծառայությանը (PAD):
Հայտերը Մանկավարժական փոխանակման ծառայությանը պետք է ներկայացնել ամենաուշը 2024թ. մայիսի 15-ին:
Մասնակցային պայմանների վերաբերյալ մանրամասն տեղեկություններ կարող եք ներբեռնել ստորև նշված հղումով․