Բարի գալուստ ԳԴՀ արտգործնախարարության կայքէջերում

Գերմանիայի անդամակցությունը ՄԱԿ-ի անվտանգության խորհրդում

ՄԱԿ-ի Անվտանգության խորհրդում Գերմանիայի անդամության լոգոտիպը

ՄԱԿ-ի Անվտանգության խորհրդում Գերմանիայի անդամության լոգոտիպը, © Federal Foreign Office

26.06.2018 - Հոդված

2018թ. հունիսի 8-ին Գերմանիան ընտրվեց ՄԱԿ անվտանգության խորհրդի 2019/20թ. ոչ մշտական անդամ՝ այսպիսով վեցերորդ անգամ այս դերում կարևոր պատասխանատվություն ստանձնելով աշխարհում խաղաղության և անվտանգության համար: 2019թ. հունվարի մեկից Գերմանիան երկու տարով ՄԱԿ-ի անվտանգության խորհրդի ոչ մշտական անդամ է:

Գերմանիան այս կառույցում իր միջազգային նպաստը կբերի հակամարտությունների հաղթահարմանն ու կանխարգելմանը: Զուգահեռաբար Գերմանիան շեշտադրումներ կանի «Կլիմա և անվտանգություն», «Կանայք, խաղաղություն և անվտանգություն» ոլորտներում, կսատարի մարդասիրական օգնություն իրականացնողներին, կնպաստի միջազգային ապասպառազինմանը:

ՄԱԿ-ի անվտանգության խորհուրդն իր հինգ մշտական և տաս ոչ մշտական՝ երկու տարին մեկ ընտրվող անդամներով միակ կառույցն է, որն իրավասու է կայացնել միջազգային իրավունքի ուժ ունեցող որոշումներ: Վերջին անգամ Գերմանիան Անվտանգության խորհրդի ոչ մշտական անդամ է եղել 2011/12թ.: 2019/20թ. Անվտանգության խորհրդում որպես ոչ մշտական անդամներ ներկայացված կլինեն նաև Բելգիան, Դոմինիկյան Հանրապետությունը, Ինդոնեզիան և Հարավային Աֆրիկան:

Որո՞նք են Գերմանիայի առաջնահերթություններն Անվտանգության խորհրդում

Անվտանգության խորհուրդը ՄԱԿ-ի այն կարևորագույն մարմինն է, որը երաշխավորում է խաղաղություն ու անվտանգություն ողջ աշխարհում: Մանդատների երկարացման և ճգնաժամերի դեպքում կառուցողական, մասնակցային գործակցության միջոցով Գերմանիայի անդամակցությունը կսևեռվի հակամարտությունների հաղթահարման վրա: Բացի այդ՝ Գերմանիան կջանա առավել քան մինչ այժմ խթանել Անվտանգության խորհրդի գործունեությունը հակամարտությունների կանխարգելման ոլորտում՝ անվտանգության համապարփակ հասկացության իմաստով:

Գերմանիան ցանկանում է Անվտանգության խորհրդի օրակարգում խարսխել նաև այնպիսի առանձնահատուկ թեմաներ, որոնք դուրս են գալիս ընթացիկ հրատապ ճգնաժամային իրավիճակների սահմաններից: Դրանցից են, առաջին հերթին, կլիմայի փոփոխության և անվտանգային քաղաքականության միջև առնչակցությունները, կամ համավարակների հետևանքները համաշխարհային անվտանգության վրա: Կլիմայական փոփոխությունները գնալով ավելի ու ավելի մեծ թվով երկրների համար են դառնում անվտանգային խնդիր, օրինակ՝ կղզի-պետությունների, որոնց համար ծովի մակարդակի բարձրացումն անմիջական սպառնալիք է:

Բացի այդ՝ Գերմանիան հանդես կգա հանուն «Կանայք, խաղաղություն, անվտանգություն» օրակարգի. այստեղ խնդիրը ոչ միայն հակամարտությունների կանխարգելման և հաղթահարման ոլորտում կանանց դերի խթանումն է, այլև հակամարտություններում վերջիններիս առավել արդյունավետ պաշտպանությունը սեռական բռնություններից: Երկուսն էլ Գերմանիայի արտաքին, անվտանգային, պաշտպանական և զարգացման քաղաքականության առանցքային բաղադրիչներից են: Այս համատեքստում Գերմանիան 2020թ. Դոմինիկյան Հանրապետության հետ միասին ստանձնել է Կանանց, խաղաղության և անվտանգության հարցերով ոչ պաշտոնական փորձագիտական խմբի համանախագահությունը:  Գերմանական նախագահության ներքո 2019թ. ապրիլի 23-ին ընդունված 2467 բանաձևը կարևոր ձեռքբերում էր հակամարտությունների ժամանակ սեռական բռնության դեպքերը առավել արդյունավետորեն կանխելու և այդպիսի դեպքերը քրեաիրավական ճանապարհով լուծելու ուղղությամբ:

Գերմանիան հանդես կգա նաև հանուն մարդասիրական համակարգի զորացման՝ ձգտելով հասնել միջազգային մարդասիրական իրավունքի  ավելի արդյունավետ իրացմանը, մարդասիրական օգնություն իրականացնողների առավել արդյունավետ պաշտպանությանը, նրանց գործունեության առավել անխոչընդոտ իրականացմանը, զինված հակամարտություններում խաղաղ բնակչության առավել արդյունավետ պաշտպանությանը: Բազմակողմանիության ալյանսի գործընկեր պետությունների հետ միասին Գերմանիան 2019թ. սեպտեմբերին ներկայացրեց մարդասիրական միջազգային իրավունքը խթանելուն և հարգելուն ուղղված „Humanitarian Call for Action“ նախաձեռնությունը: Այս շրջանակում Գերմանիան դաշինքի հետ միասին հանդես է գալիս ծանր հանցագործությունների դեպքում պատասխանատվության չկանչվելը բացառելու օգտին: Որպես Անվտանգության խորհրդում „Syrien humanitär“ առաքելության համալիազոր՝ մենք հանդես ենք գալիս հանուն օգնության կարիք ունեցող մարդկանց մարդասիրական օգնություն հասցնելու հասանելիության: Որպես մարդասիրական ոլորտում կարևորագույն միջազգային դերակատար՝ Գերմանիան լայնածավալ աջակցություն է ցուցաբերում նաև հակամարտություններից տուժած տարածաշրջանների խաղաղ բնակչությանը՝ այսպիսով ընդգծելով միջազգային իրավունքի նորմերը և մարդասիրական սկզբունքները հարգելու իր նվիրվածությունը:

Միջուկային սպառազինության վերահսկման երկու դեբատների և փոքր զենքերի վերաբերյալ բանաձևի նախագծի մշակման միջոցով Գերմանիան նոր ազդակներ է հաղորդում ապասպառազինման ու սպառազինությունների վերահսկման ոլորտին: Գերմանիան հանդես է գալիս հօգուտ սպառազինությունների վերահսկման միջազգային նոր կառույցի ստեղծման: Այն պետք է ընդգրկի ոչ միայն միջուկային, այլև, օրինակ, ինքնաշխատ զինահամակարգերը:

Եվ վերջապես՝ մարդու իրավունքների համընդհանուր հարգումն ու անվտանգությունը Գերմանիայի համար առանցքային խնդիրներ են մնալու նաև Անվտանգության խորհրդի շրջանակում: Մարդու իրավունքների համատարած խախտումները, որոնք հաճախ հակամարտությունների թե' ախտանշան, թե՛պատճառ են դառնում, պետք է քննարկվեն նաև Անվտանգության խորհրդում: Ամենատարբեր առանձին նախաձեռնությունների շարքում կարելի է առանձնացնել Գերմանիայի հրավերը՝ ուղղված Մարդու իրավունքների բարձր կոմիսար Միշել Բաչելեին՝ հանդես գալու բրիֆինգով, կամ ոչ պաշտոնական հանդիպման կազմակերպումը խաղաղապահ առաքելություններում մարդու իրավունքների հարցերով պատասխանատուների հետ:

Ինչպե՞ս է ընթանում Գերմանիայի անդամակցությունը Անվտանգության խորհրդում

Դեռևս 2018թ. հոկտեմբերի 1-ից Գերմանիան դիտորդի կարգավիճակով մասնակցել է Անվտանգության խորհրդի բոլոր նիստերին: 2019թ. հունվարից Գերմանիան լիարժեք անդամ է:

2019թ. ապրիլին Գերմանիան, հերթագայելով Ֆրանսիային, իր ակտիվ անդամակցության ժամանակ առաջին անգամստանձնեց Անվտանգության խորհրդի  նախագահությունը: Երկու նախագահություններն  Անվտանգության խորհրդի պատմության մեջ առաջին անգամ որպես «երկվորյակ նախագահություններ» կապակցվեցին բովանդակային առումով: Այս տարի նույնպես՝ հուլիսին, Անվտանգության խորհրդի գերմանական նախագահությունը կմտնի «Եվրոպական գարնան» շարքերը, որը մայիսին բացել էր Էստոնիան, իսկ հունիսին շարունակել Ֆրանսիան: Եվրամիության կուռ միասնականությունը Գերմանիայի համար կարևորագույն խնդիր է նաև և հե՛նց Նյու Յորքում՝ Միավորված ազգերի կազմակերպությունում: Մեր ձայնը շատ ավելի մեծ կշիռ կունենա, եթե մենք՝ եվրոպացիներս, միասնական դիրքորոշում ունենանք: Նպատակը միասնաբար գործելն է: Այդ պատճառով է, որ Գերմանիան նաև Անվտանգության խորհրդում է բոլոր խնդիրները համաձայնեցնում ԵՄ իր գործընկերների հետ: Ներկայում Անվտանգության խորհրդում ներկայացված է ԵՄ չորս պետություն:

Գերմանիայի հանձնառությունը ՄԱԿ-ում

Գերմանիան քաղաքական, ֆինանսական և մարդկային ռեսուրսների առումով  ծանրակշիռ մասնակցություն ունի ՄԱԿ-ում, մասնավորապես՝ իր մարդասիրական հանձնառությանը զուգահեռ՝ Գերմանիան կանոնավոր և խաղաղապահ առաքելությունների բյուջեների չորրորդ խոշոր, ինչպես նաև զարգացման նպատակով այլ երկրներին ցուցաբերվող պաշտոնական  օգնության ոլորտի երկրորդ խոշոր դրամատուն է: Բացի այդ՝ Գերմանիան այս տարիներին համալրել է ՄԱԿ-ի խաղաղապահ առաքելություններին զորամիավորումներ տրամադրող խոշորագույն արևմտյան երկրների շարքը և ակտիվորեն մասնակցում է Մալիում և Լիբանանում իրականացվող ռազմական գործողություններին և խաղաղապահ առաքելություններին:

դեպի էջի սկիզբ