Գերմանիայի Դաշնային Հանրապետության արտաքին գործերի նախարարությունն իր կրթամշակութային քաղաքականության շրջանակում աջակցություն է ցուցաբերում նաև Տնտեսական համագործակցության և զարգացման կազմակերպության (OECD) անդամ երկրների Զարգացման աջակցության կոմիտեի (DAC) ցուցակի երկրների մարզիչների համար կազմակերպվող դասընթացներին։

Գերմանիայի թեթև ատլետիկայի միության՝ արտասահմանցի մարզիչների վերապատրաստման հայտնի կենտրոնը, որը գործում է Մայնցի համալսարանում, Գերմանիայի արտգործնախարարության հանձնարարությամբ 2019թ․ կանցկացնի իր 42-րդ միջազգային մարզչական դասընթացը՝ 2019թ․ հունիսի 1-ից մինչև 2020թ․ հուլիսի 31-ը՝ ներառյալ գերմաներենի նախապատրաստական դասընթացը։ Մարզչական դասընթացի ավարտին հաջող հանձնած քննության պարագայում մասնակիցները կստանան թեթև ատլետիկայի մարզչի դիպլոմ։

Մրցույթը հասցեագրված է մարզիչներին, ինչպես նաև թեթև ատլետիկայի ոլորտի սպորտի ուսուցիչներին: Դիմել կարող են նաև այն պրոֆեսիոնալ մարզիկները, որոնք արդեն ցանկանում են անցնել մարզչական աշխատանքի: Դիմել կարող են մինչև 40 տարեկան անձինք:

Գերմանական կողմն ստանձնում է հետևյալ ծախսերը․

• մասնագիտական և լեզվական կրթության ծախսերը,
• ամսական կրթաթոշակ 400 եվրոյի չափով,
• բնակարանի վարձ,
• բժշկական ապահովագրություն (կարևոր ցուցում՝ արդեն առկա հիվանդությունների և ատամների փոխարինման ծախսերը չեն փոխհատուցվում),
• ուսումնական միջոցներ՝ միանվագ
• միանվագ դրամական նպաստ (300 եվրո)՝ ձմեռային հագուստի համար։

Մուտքի արտոնագրի (վիզայի) համար վճար չի գանձվում։

Սույն ծախսերը չեն ներառում ճանապարհածախսը, որը համարվում է գործընկերային ներդրում՝ գործուղող երկրների կամ դասընթացների մասնակիցների կողմից։

Լրացված դիմումաձևը Թեթև ատլետիկայի ազգային ֆեդերացիայի կողմից տրված երաշխավորագրի, առողջության վերաբերյալ տեղեկանքի և 4 բիոմետրիկ լուսանկարների հետ միասին անհրաժեշտ է մինչև 2018 թ․ նոյեմբերի 16-ը ներկայացնել Երևանում Գերմանիայի Դաշնային Հանրապետության դեսպանություն։

Հավելյալ տեղեկություններ կարող եք քաղել այս տեղեկատվական թերթիկից և սույն կայքէջից՝ գերմաներեն․ www.leichtathletik.de